|
Borgarfjörður eystri býr yfir mikilli náttúrufegurð og töfrum. Fjallasýn er þar stórkostleg enda fjölbreytni fjallanna við brugðið. Kauptúnið Bakkagerði er fyrir botni fjarðarins, fallegt lítið sjávarþorp og landbúnaður er stundaður í dalnum inn af firðinum. Í Borgarfirði eru mjög skemmtilegar fjörur, bæði sandfjörur og einnig fjörur með ávölu sjávarslípuðu grjóti. Í fjörum í Borgarfirði svo og annars staðar á svæðinu er að finna mikið úrval fágætra steina. Mikið er tínt af steinum en vert er að hafa í huga að oft eru þeir betur komnir í náttúrunni og ferðamenn mættu sýna hófsemi. Sjálfsagt er að biðja um leyfi því landið er í einkaeign.
|
